Aktivistët e Zall-Gjoçaj protestë para gjykatës: Të merret në shqyrtim ankimimi i vendit pro HEC-eve!
Protesta u
zhvillua pikërisht përballë këtij institucioni si kërkesë për të marrë në
shqyrtim ankimimin e vendimit të marrë nga Gjykata Administrative e Shkallës së
Parë në qershor të vitit 2020, ku u rrëzua padia e nëntë banorëve dhe u lejua
vijimi i punimeve për të ngritur digë brenda zonës së mbrojtur.
Ata i mëshuan
rëndësisë së funksionimit të drejtësisë së re, pasi koha për ta nuk prek. Teksa
dosja e tyre rreshtohet mes qindra rasteve të tjera që pritet të shqyrtohen,
punimet në terren për të përfunduar hidrocentralet vijojnë me ritme të shpejta.
“U bë tashmë një
vit që kur ne kemi dorëzuar ankimet dhe nuk kemi ende asnjë lajm. Kompania
ndërtuese vijon punimet brenda në Park Kombëtar, aty ku me ligj nuk lejohen as
bagëtitë të kullosin”, lexon para Gjykatës së Apelit Aurora Leka.
Të njëjtën gjë
pohon edhe Adem Xhokola, banor i fshatit Gjoçaj. Punimet për HEC-in “Sekë” në
lumin Urakë, kanë sjellë pasoja, përcjell ai.
“Të shkosh sot
dhe të shohësh rrjedhën e lumit Urakë që vjen nga Kurbneshi… asht qelb e gjithë
rrjedha e lumit sepse kanë ngordhur peshqit, trofta”, – citon 70-vjeçari
Xhokola.
Ai, së bashku me
Hasan Pashën dhe Abdi Toçin janë nisur për të ardhur në Tiranë para agimit.
Rrugëtimi i vështirë u kushton atyre dy orë në këmbë dhe katër orë me makinë.
“Jemi zgjuar që
në orën katër të mëngjesit, për t’i thanë drejtësisë shqiptare: zbatoni
ligjet”.
Të pranishëm në
këtë protestë ishin dhe qytetarë të zonave të tjera të prekura nga ndërtimi i
hidrocentraleve në zonën e Dibrës.
Të tjerë
aktivistë e konsideruan këtë kauze me rëndësi publike dhe kërkuan prioritet në
trajtimin e saj.
Fill pas
protestës, Gjykata Administrative e Apelit u shpreh se ata po përballen me një
volum pune të lartë, ku trupa gjyqësore prej shtatë gjyqtarësh ka përafërsisht
një ngarkesë prej rreth 16.850 dosjesh gjyqësore në gjykim.
“Nga ana e trupës
gjyqësore janë ende duke u gjykuar çështjet e regjistruara pranë kësaj gjykate
në vitin 2016, ndërkohë që çështjet e përmendura më sipër janë regjistruar për
gjykim në vitet 2020 e 2021”, shkruajnë në reagimin e tyre.
Duke e
konsideruar të vështirë situatën në të cilën ndodhet sistemi i drejtësisë, ata
kërkuan mirëkuptimin e të gjithë aktorëve, teksa garantuan opinionin publik se
kanë angazhimin maksimal në trajtimin e çështjeve me paanshmëri.
Për të lexuar
artikullin e plotë nga Entenela Ndrevata, klikoni Citizens Channel.