Gjirokastër, mjedis i pastër prioritet i buxhetit lokal 2022

Botuar nga Blerim Kore me 14 Nov, 2021.

Investimet për një mjedis të pastër, në funksion edhe të zhvillimit të turizmit, është prioriteti i Bashkisë Gjirokastër në buxhetin lokal për vitin 2022. Projektbuxheti për vitin e ardhshëm po diskutohet me grupet e interesit dhe komunitetin në dëgjesat publike që zhvillohen në qytet dhe njësitë administrative. Sipas kryetarit të Bashkisë, Flamur Golemi, kryefjala e buxhetit lokal 2022 është mirëmenaxhimin i mbetjeve urbane dhe mbrojtja e mjedisit. "Përgjatë projektbuxhetit që po diskutojmë në dëgjesat publike, kemi parashikuar investime në vendgrumbullimin e mbetjeve urbane, përmirësim të infrastrukturës teknike për depozitimin dhe transportimin e mbetjeve, rritje të numrit të kontejnerëve dhe koshave si në lagjet e qytetit ashtu dhe në fshatra", shprehet kryebashkiaku Golemi. Në bashkëpunim me komunitetin synohet që investime të tilla të shërbejnë për një mjedis të pastër, i cili do të ishte një pikë e fortë për zhvillimin e turizmit në tërësi dhe aq më tepër të turizmit kulturor dhe agroturizmit në zonën e Gjirokastër. Aktualisht në Gjirokastër strukturat e institucioneve publike, pushtetit vendor si dhe komunitetit janë bërë pjesë e nismës kombëtare për pastrimin e mjedisit. Shqetësim në këtë drejtim është depozitimi i mbetjeve urbane në mjediset publike, shtretërit e përrenjve, etj. duke shkaktuar ndotjen e mjedisit.